Tinuldukan na ng aktor na si Gerald Anderson ang usapin tungkol sa ugnayan nila ng batang aktres na si Julia Barretto nang amining ito ang nagpapasaya sa kaniyang puso ngayon.
Kasabay ng pag-ere ng kaniyang panayam kay “King of Talk” Boy Abunda, dumalo rin aktor sa isang press launch ng isang vitamin brand nitong Biyernes kung saan natanong ito kung nasa plano na rin ba niyang bumuo ng sariling pamilya.
“Gusto ko na magka-pamilya. Is it the right time? I don’t think so. I think marami pa akong kailangan matutunan. Ang dami kong natutunan during the pandemic, mga lessons na tinuro sa ating lahat. So I’m just taking my time and we’ll see. Malalaman n’yo rin ’yan,” saad ni Anderson base sa ulat ng Push. Dagdag pa ng 31-anyos na aktor, kailangan umanong paghandaan ang ganoong desisyon sa buhay lalo na ang finances kaya naman hindi ito nagmamadaling bumuo ng pamilya.
Sa naging panayam kay Abunda, kinumpirma ni Anderson ang namamagitan sa kanila ni Barretto na una nang naging usap-usapan matapos ang kontrobersyal na hiwalayan nila ni Bea Alonzo.